ကျွန်တော် ပုံမှန် OSM မှာ ရန်ကုန်မြို့ရဲ့ လမ်းတွေ နောက်ပြီး လမ်းနာမည်တွေ ပုံမှန် ထည့်ဖြစ်ပါတယ်။ ပြီးခဲ့တဲ့ အပတ်လောက်က OSM ရဲ့ data ပေါ်မှာ ဇော်ဂျီ နဲ့ ထည့်ထားတဲ့ လမ်း အမည် တွေ တွေ့တာကြောင့် တစ်ခုခြင်းစီ ကို လိုက်ပြောင်းနေပေမယ့် အကုန် ကျွန်တော် မပြင်နိုင်ပါဘူး။

အရင်ဆုံး OSM နဲ့ မရင်းနှီးသည့် သူတွေအတွက် OSM ဆိုတာ ဘာလဲ ရှင်းပြ ပါရစေ။ OSM ဆိုတာ မြေပုံ data ကို Opensource ပေးထားပြီးတော့ ဘယ်သူ မဆို ဝင်ရောက်ပြုပြင်နိုင်ပါတယ်။ Wiki လိုပေါ့။ ဒါကြောင့် လမ်းနာမည်တွေ အဆောက်အအုံ အမည်တွေကို ဘယ်သူမဆို ပြင်လို့ ရတယ်။ ပြင်ပြီးတာနဲ့လည်း ချက်ခြင်း ပြောင်းပေမယ့် OSM data မှာကတော့ map rendering အတွက် ၁ ရက် ၂ ရက် လောက်စောင့်ရပါတယ်။ သို့ပေမယ့် data ကို download ချပြီး အသုံးပြုရင်တော့ နောက်ဆုံး data ရပါတယ်။

Who are using Openstreet Map ?

OSM ကို အသုံးပြုထားတဲ့ သူတွေကတော့

• Apple Map
• MapBox
• Galileo
• Maps.me
• Yangon Map Offline
• အခြား Apps များ …

Apple

Apple က OSM data တွေကို အသုံးပြုထားပြီးတော့ အခု နောက်ဆုံး map data update မှာ ရန်ကုန်မြို့ကိုပါ update လုပ်ထားပေးပါတယ်။ ဘာလို့ သိသလဲ ဆိုရင်တော့ OSM မှာ ကျွန်တော် ဖြည့်ထားတဲ့ လမ်းတွေ နာမည်တွေ အကုန်လုံးကို အခု Apple Map မှာ မြင်နေရပါပြီ။ Apple Map က google map လောက်တော့ မစုံပါဘူး။ သို့ပေမယ့် iOS App တွေအနေနဲ့ light weight ဖြစ်အောင် Apple Map က လွဲပြီး တစ်ခြား Map တွေ များများ စားစား ရွေးချယ်လို့ မရဘူး။ ဒါကြောင့် OSM မှာ data တွေကို ကူညီပြီး ဖြည့်ခြင်းအားဖြင့် Apple Map ကို ကူညီရာလည်း ရောက်ပါတယ်။

MapBox

MapBox ကတော့ လက်ရှိ နာမည်ကြီးတဲ့ map service ပါ။ သူလည်း OSM data ကို အသုံးပြုထားပါတယ်။ MapBox က developer သဘောကျသည့် အကြောင်းကတော့ map ကို customize လုပ်ရတာ အရမ်းလွယ်တယ်။ Map ရဲ့ အရောင်တွေ ပုံတွေကို လွယ်လင့် တကူပြောင်းလို့ ရတာကြောင့် နာမည်ကြီးရတာပါ။

Galileo and Maps.me

ကျွန်တော် လက်ရှိ အသုံးပြုနေတဲ့ Apps ၂ ခုပါ။ ရန်ကုန် ပြန်ရင် Offline အတွက် အဲဒီ App ၂ ခုကို အသုံးပြုပါတယ်။ လမ်းနာမည်တွေသိတယ် ဘယ်လို သွားရမလဲ သိရင် Galileo ကို အသုံးပြုပါတယ်။ GPS နဲ့ track လုပ်ပြီးတော့ OSM မှာ မရှိတဲ့ data တွေကို ကျွန်တော် ပြန်ပြီး update လုပ်ပေးဖို့ အတွက် Galileo ကို အသုံးပြုပါတယ်။ Maps.me ကတော့ routing ပိုင်း ပါတဲ့ အတွက် ဘယ်လို သွားရမလဲ မသိတဲ့ အခါမှာ အသုံးပြုပါတယ်။

Yangon Map Offline

Galileo နဲ့ Maps.me အသုံပြုရင်းနဲ့ data တွေက နောက်ဆုံး data တွေ မရတာနဲ့ ကိုယ်ပိုင် Map app တစ်ခု ဖန်တီးဖြစ်တာပါ။ Yangon Map ရဲ့ data ကို နေ့စဉ် update လုပ်ပေးပါတယ်။ ဒါကြောင့် ဒီနေ့ ပြင်လိုက်တဲ့ data ဟာ နောက်နေ့မှာ Yangon Map Offline ကနေ download ဆွဲချလို့ ရပါပြီ။ ရန်ကုန်ပြန်တဲ့ အခါမှာ ကျွန်တော့် အတွက် အလွန်ကို အသုံးဝင်ပါတယ်။ နောက်ပြီး လမ်းနာမည်တွေကို ရှာတဲ့ အခါမှာ မြို့နယ် အလိုက် ခွဲပြီးတော့ ပြပေးတဲ့ အတွက် ကျွန်တော့် အတွက် အတော်အဆင်ပြေပါတယ်။ ကျွန်တော် ရေးထားတဲ့ App ဖြစ်တဲ့ အတွက် ကျွန်တော့် အတွက် အဆင်ပြေအောင် အဓိက ဖန်တီးထားပါတယ်။ နောက်ပြီးတော့ offline routing ထည့်ဖို့ ကြိုးစားနေပေမယ့် အခု အချိန်ထိ အချိန် မပေးနိုင်လို့ မလုပ်ဖြစ်သေးပါဘူး။ iOS အတွက်လည်း App ဖန်တီးချင်ပါတယ်။ သို့ပေမယ့် အချိန် ပေးဖို့ မအားသေးတာကြောင့် iOS အတွက်က အတော့်ကို ကြာပါအုံးမယ်။

Zawgyi VS Unicode in Openstreet Map

ဇော်ဂျီ နဲ့ Unicode ပြဿနာက နှစ်ပေါင်းများစွာ ကြာမြင့်တာတောင် မပြီးသေးတဲ့ ပြဿနာ တစ်ခုပါ။ Wiki ကို ဖန်တီးတုန်းကလည်း ပြဿနာ တစ်ခု ဖြစ်ခဲ့သလို အခု OSM မှာလည်း ဇော်ဂျီ နဲ့ အသုံးပြုလိုသူတွေ ၊ ဇော်ဂျီ နဲ့ မှ မြင်လို သူတွေ ရှိပါတယ်။

သို့ပေမယ့် OSM ရဲ့ rendering engine , Mapnik ဟာ unicode ကိုပဲ support လုပ်ထားပါတယ်။ ဇော်ဂျီ font ကို support လုပ်မထားပေးပါဘူး။ လက်ရှိ Mapnik 2 ကို အသုံးပြုထားတဲ့အတွက် unicode rendering က ပြဿနာဖြစ်နေပေမယ့် Mapnik 3 မှာ အဆင်ပြေသွားပါပြီ။ OSM ကတော့ ဘယ်အချိန်မှ Mapnik 3 ကို update လုပ်မလဲ မသိပါ။

Galileo ကလည်း Unicode font ကိုပဲ support လုပ်ထားတဲ့ အတွက် မြန်မာစာကို unicode နဲ့မှသာ မြင်ရပါလိမ့်မယ်။ ဒါကြောင့် ကျွန်တော် OSM မှာ data တွေ စထည့် ကတည်းက Unicode နဲ့သာ ထည့်ခဲ့ပါတယ်။

ဇော်ဂျီက ပုံမှန် တကိုယ်ရေးသုံး အတွက် အဆင်ပြေပေမယ့် နိုင်ငံတကာနဲ့ ဆိုင်တာတွေကိုတော့ Unicode နဲ့ သာ အသုံးပြုချင်ပါတယ်။ ဘာကြောင့်လည်း ဆိုတော့ OSM မှာ ဇော်ဂျီနဲ့ မြင်ချင်ပါတယ် ဆိုပြီး သွားတောင်းဆိုရင် နိုင်ငံတကာ စံညွှန်း မဟုတ်တဲ့ အတွက် လက်ခံ မှာ မဟုတ်ပါဘူး။ Mapnik မှာ Unicode rendering မမြင်ရလို့ သွားပြောတဲ့ အခါမှာ Mapnik 3 မှာ အဆင်ပြေသွားပါတယ်။ နိုင်ငံတကာနဲ့ ဆိုင်တဲ့ product တွေမှာ Unicode နဲ့သာ အဆင်ပြေပါတယ်။ နိုင်ငံတကာ စံညွှန်း ဖြစ်တဲ့ အတွက်ကြောင့် တစ်ခုခု အမှားဖြစ်နေရင် bug report လုပ်ရတာ အဆင်ပြေပါတယ်။ ဒါကြောင့် ကျွန်တော် OSM မှာ unicode နဲ့ ဖြည့်နေရတာပါ။

Help to OSM

OSM ကို တစ်ခါမှ အသုံးမပြုဘူးသူတွေ အနေနဲ့ တစ်ခါလောက် ဝင်ကြည့်လိုက်ပါ။ ပြီးရင် ကိုယ့်အိမ် ရှိတဲ့ လမ်းနာမည် မှန်ရဲ့လား ဒါမှမဟုတ် လမ်း နာမည် မရှိသေးဘူးဆိုရင် တစ်ခါတည်း ဝင်ဖြည့်ပေးပြီးတော့ OSM ကို ကူညီပေးပါ။ အခု အချိန်မှာတော့ ကျွန်တော် ရန်ကုန်မြို့ကိုသာ အဓိက ဖြည့်နေပါတယ်။ ဘာကြောင့်လည်း ဆိုတော့ ကျွန်တော် ရန်ကုန်မြို့ရဲ့လမ်းတွေကိုသာ သိလို့ပါ။

ဒါကြောင့် တစ်နိုင်ငံလုံး တစ်မြို့လုံး data တွေ မဖြည့်နိုင်ရင်တောင် ကိုယ့် အိမ် ဝန်းကျင်က data လေးတွေကို ဖြည့်ပြီးတော့ OSM ကို ကူညီပေးပါ။ OSM ကို ကူညီခြင်းဖြင့် ကျွန်တော်တို့တွေ အသုံးပြုနေတဲ့ Offline Map ဟာ ပိုပြီးတော့ ပြည့်စုံလာပါလိမ့်မယ်။