ဒီ ၃ လ အတွင်း ထွေထွေထူးထူး မလုပ်ဖြစ်ပဲ ဂါထာ ကိုပဲ ပြီးအောင် ရေးနေတယ်။ ဂါထာ ဆိုတာကတော့ ရွတ်ရတဲ့ ဂါထာ မဟုတ်ပါ။ iPhone, iPad app တစ်ခုပါ။

Gardar ဆိုတာ ဘာလဲ ?

Gardar ဆိုတာကတော့ Google Reader App တစ်ခုပါ။ မြန်မာ unicode နဲ့ ဇော်ဂျီဖတ်လို့ရပါတယ်။ နောက်ပြီးတော့ ခမာ စာတွေပါ ဖတ်လို့ရအောင် ဖန်တီးပေးထားပါတယ်။ ခမာ unicode ကလည်း အခု အချိန်ထိ iOS 5 မှာ အလုပ်မလုပ်သေးပါဘူး။ ဒါကြောင့် ခမာ unicode ပါ ထည့်သွင်းပေးထားတာပါ။

ဘာလို့ Gardar ကို ရေးရတာလဲ

မြန်မာတွေ Google Reader က iPhone , iPad ကနေ ဖတ်လို့ရအောင်ပါ။ မိုးကုတ် browser နဲ့ ဖတ်လို့ရပေမယ့် ကျွန်တော် google reader ဖတ်ရင် သုံးနေရ Read It Later , Delicious , Facebook Share, Twitter Share စတာတွေက သုံး မရပါဘူး။ ဒါကြောင့် ကိုယ့်ဘာသာကိုယ် ရေးဖို့ ဆုံးဖြတ်လိုက်တာပါ။

Offline ရလား ?

အခု version မှာတော့ မရသေးပါဘူး။ ကျွန်တော် Offline ရဖို့အတွက် ၂ လ လောက် လုပ်သေးတယ်။ Offline အတွက် အရင်ကြိုးစားကြည့်တာကြောင့် တော်တော် အချိန်ကုန်သွားတယ်။ Offline က ထင်တာထက် ပိုခက်နေလို့ အခု version မှာ မထည့်ထားသေးပါဘူး။

Free version လား ?

ဟုတ်ပါတယ်။ အခု version 1.0 က free version ပါ။ ကျွန်တော် google reader ရဲ့ full functionality ကို အသုံးမပြုထားသေးပါဘူး။ နောက်ပြီးတော့ UI ကလည်း Native UI ပါပဲ။ ရှင်းရှင်းပြောရရင် ကျွန်တော် version 1.0 ကို စိတ်မကျေနပ် သေးပါဘူး။ ကျွန်တော် design ပိုင်းကို အသေးစိတ် ပြန်ပြင်ချင်တယ်။ အခု ၃ လအတွင်းမှာ development ပိုင်းကိုပဲ အာရုံစိုက်ပြီး လုပ်ထားရတော့ design ပိုင်းက လုံးဝ ကို မကောင်းဘူး။ full functionality မရသေးဘူးဆိုတာကလည်း မလိုတာကြောင့် မထည့်တာပါ။

တနည်းပြောရင် Free version တစ်ခုအဖြစ်တော့ စိတ်ကျေနပ်လောက်စရာ ရှိပါတယ်။ သို့ပေမယ့် Paid version ဆိုရင်တော့ ကျွန်တော်တောင် ဝယ်မသုံးချင်ဘူး။ အခု app က ပိုက်ဆံပေး ဝယ်သုံးရသလောက် မတန်သေးဘူးပေါ့။

Google App user တွေကော အသုံးပြုလို့ရသလား

ရပါတယ်။ Google App user တွေက 2-step verification လိုပါတယ်။ ကျွန်တော် ကိုယ်တိုင် Google App email ပဲ အသုံးပြုနေပါတယ်။ အဆင်ပြေပါတယ်။ 2-step verification ကတော့ မြန်မာနိုင်ငံအတွက် အဆင်မပြေပါဘူး။ ဘာလို့လည်းဆိုတော့ ဖုန်းနံပတ် လိုလို့ပါ။ ဒါကြောင့် မြန်မာနိုင်ငံကနေ အသုံးပြုရင်တော့ မူရင်း google account က သာ အဆင်အပြေဆုံးပါ။

ရေးသားရတဲ့ အချိန် ဘယ်လောက်ကြာသလဲ

၃ လ လောက် ကြာပါတယ်။ အစောပိုင်းမှာ ကိုယ်ပိုင် network framework လေး တစ်ခုနဲ့ ရေးဖို့ ကြိုးစားတယ်။ နောက်ပိုင်း RestKit ကိုတွေ့တော့ RestKit နဲ့ စမ်းတယ်။ နောက်ဆုံးတော့ MKNetworkKit နဲ့ မှ ငြိမ်သွားတာ။ Google Reader API ကို ဖတ်ထားတာကတော့ ၃ လ မကတော့ပါဘူး။ လုပ်မယ်ဆိုပြီး စိတ်ထဲမှန်းထားပေမယ့် အချိန် မရှိသေးတာကြောင့် API သုံးပုံ သုံးနည်းပဲ ဖတ်ထားတာပါ။ အစ ပိုင်းကတော့ နားမလည်ပေမယ့် လုပ်ရင်းလုပ်ရင်းနဲ့ သဘောပေါက် နားလည်သွားပါတယ်။

တကယ့် development အချိန်ကတော့ ၁ လောက်ပဲ ကြာတယ်လို့ ဆိုရမယ်။ စနေ တနင်္ဂနွေ ပဲ ရေးဖြစ်တာပါ။ ရုံးက ပြန်ရောက်ရင် ဘာမှ ကို မလုပ်နိုင်တော့ သလို coding လည်း မစဉ်းစားနိုင်တော့ဘူး။ ဒါကြောင့် app တစ်ခု ရေးချိန်မှာ Dhama Stream, Ornagai , OrnagaiMe တို့ကို update မလုပ်ဖြစ်ဘူး ဖြစ်သွားတယ်။ Dhama Stream မှာ ပြင်စရာလေးတွေ ကို နောက် ၂ ပတ်လောက်မှ စပြင်ဖြစ်မယ်ထင်တယ်။

ဘယ်အချိန် download ချလို့ ရမလဲ

App store ပေါ်ကိုတော့ တင်ထားပြီးပါပြီ။ နောက်အပတ်လောက်ဆိုရင် ရနိုင်လောက်ပါတယ်။ Gardar Website မှာ email signup လုပ်ထားရင် ကျွန်တော် ရတာနဲ့ အကြောင်းကြားပေးမှာပါ။