update: ညမီးအိမ် unicode သုံးလို့ရသွားပါပြီ။ ပြဿနာက Masterpiece Uni Sans font ကို windows မှာ သွင်းထားမိလိုက်လို့ပါ။

ပြီးခဲ့တဲ့ ၂ ရက်လောက်က facebook မှာ ညမီးအိမ်က MZ ကို ပြန်လာချင်တယ်။ ခက်တာက Unicode ထက် ဇော်ဂျီကို သုံးချင်တယ်လို့ ဆိုပါတယ်။ နောက်ပြီးတော့ Unicode ကို အခုထက်ထိ မသုံးတတ်သေးဘူးလို့လည်း ဆိုလာပြန်တယ်။ သူ့လို ဘဝတူတွေ ရှိပါတယ်ဆိုတာကို သိစေချင်တယ်လို့ ရေးလာပါတယ်။

တွေ့တွေ့ချင်းပဲ ချက်ခြင်းပြန်ဖြေမလို့ ဆိုပေမယ့် ရုံးမှာ အလုပ်ချိန် ဖြစ်နေတာကြောင့် ဖြစ်သလို နောက်ပြီး ရှင်းရင်လည်း အများကြီး ရေးနေရမှာ ဆိုးတာကြောင့် post တစ်ခု အနေနဲ့ပဲ ရေးလိုက်ပါတယ်။

ညမီးအိမ် ရေ… MZ ကို မဝင်ဖြစ်တော့တာကိုတော့ သတိထားမိတယ်။ တော်တော်များများလည်း ပြန် မဝင်တာကိုလည်း တွေ့မိပါတယ်။ တကယ်တန်း unicode ဘာကြောင့် ပြောင်းရလဲဆိုတာကို မပြောခင် MZ ဝင်ဝင်ခြင်းမှာ

MYSTERY ZILLION တွင် English သို့မဟုတ် Unicode ဖြင့်သာ အသုံးပြုခွင့်ရှိသည်။ ဇော်ဂျီ ၊ ဧရာ စသည်တို့ကို အသုံးပြုခွင့် မရှိ။ Unicode Guide ကို ဒီမှာ Download ချပါ။

ဆိုပြီး ရေးထားတာ ကို တွေ့မှာပါ။ Unicode Guide လေးကို ချပြီး စမ်းကြည့်လိုက်ရင် အဆင်ပြေသွားမှာပါ။ ညမီးအိမ် အနေနဲ့ download ချပြီး guide book ကို သေချာ မဖတ်ဖြစ်ဘူးနဲ့ တူပါတယ်။ အဲဒီ guide book လေးက အခု ဒီစာ ရေးနေတဲ့ အချိန်မှာ အကြိမ်ပေါင်း 7772 ကြိမ် download ချပြီးပါပြီ။

Unicode သုံးဖို့က font သွင်းပြီး ကြိုက်တဲ့ keyboard သုံးရုံပဲ။ ကျွန်တော် ဆိုရင် အခုထက်ထိ keymagic နဲ့ ဇော်ဂျီ layout ပဲ သုံးနေတာပဲ။ ဘာမှ စာရိုက်ပုံကို ပြောင်းပြီး ရိုက်နေစရာမလိုဘူး။ font လေး ထည့်လိုက်။ keymagic လေးသွင်းပြီး သုံးလိုက်ရုံပဲ။ လက်ကွက် ဇော်ဂျီ လက်ကွက် နဲ့ ရိုက်လိုက်ရုံပါပဲ။ အဲလောက်ထိ လွယ်ပါတယ်။ တကယ်လို့ သုံးထားတဲ့ စက်က windows server 2003 နဲ့ XP SP1 အောက်က version ဆိုရင်တော့ နည်းနည်း ပြဿနာ ဖြစ်နိုင်ပါတယ်။ XP SP1 နောက်ပိုင်း တွေမှာတော့ အဆင်ပြေပါတယ်။ သို့ပေမယ့် အခု တော်တော်များများက vista နဲ့ win 7 ပဲ သုံးနေတယ်လို့ ထင်ပါတယ်။ ဒါကြောင့် သွင်းရတာ ခက်ခဲလှတယ်မဟုတ်ပါဘူး။ server 2003 မှာတော့ နည်းနည်း ပြဿနာ လေးတွေ ရှိတာတွေ ကြားရပါတယ်။ Android နဲ့လည်း မရသေးပါဘူး။ ဒါကြောင့် android ဖုန်း အသုံးပြုတဲ့ သူတွေ အတွက် အဆင်မပြေသေးဘူးပေါ့။ Android က မြန်မာ unicode တစ်ခုတည်း ပြဿနာ ဖြစ်နေတာ မဟုတ်ပါဘူး။ အခြား language တွေမှာလည်း အလားတူ ပြဿနာ ဖြစ်နေပါတယ်။

အခုတော့ ကျွန်တော် ဘာကြောင့် unicode ပြောင်းရသလဲ ဆိုတာကို ရှင်းပြပါရစေ။ အရင်တုန်းက ဇော်ဂျီ သုံးနေရင်းနဲ့ တဖြည်းဖြည်း MZ ရဲ့ database size က 400 MB ကျော်လာတယ်ဗျ။ unicode က 5.2 မှာ တော်တော် stable ဖြစ်သွားတဲ့ အဆင့်လို့ ဆိုရမယ်။ ICU မှာလည်း မြန်မာစာ sorting support လုပ်နေပြီ။ တနည်းပြောရင် အဆင့် တစ်ဆင့်တော့ ရောက်နေပြီပေါ့ဗျာ။ အဲဒီအချိန်တုန်းက တွေးဖူးတယ်။ နောက် ၂ နှစ်လောက်ဆိုရင်တော့ OS တော်တော်များများမှာ မြန်မာ unicode အဆင်သင့် ပါလာ လောက်တော့မယ်လို့ ပြောလည်း ပြောခဲ့ဘူးပါတယ်။ ကျွန်တော် တွေးထင်တဲ့ ၂ နှစ်တောင် မကြာလိုက်ပဲ Mac OS X lion မှာ စပါလာတယ်။ အဲတုန်းကလည်း Windows မှာ မပါသေးတော့ သိပ်ပြီး ထူးခြားမှာ မဟုတ်ဘူးလို့ ဆိုကြပြန်ကော။ အခုတော့ Windows 8 မှာပါ ပါလာပြီ။ ကျွန်တော့် အနေနဲ့ အဲဒီ အချိန်မှ unicode ပြောင်းမယ်ဆိုရင် file size က 1 GB လောက် ဖြစ်သွားမယ်။ ကျွန်တော် php နဲ့ ရေးထားတဲ့ converter နဲ့ ပြောင်းတာ 400 MB လောက်ကို နာရီ ဝက်လောက် ကြာတယ်။ စာလုံးတွေ ပြန်စစ် မှားတာတွေကို code မှာ ပြန်ပြင် ပြန် run ။ အဲလို လုပ်ရတာ။ တနည်းပြောရင် ၁ ည လောက် အချိန် ကုန်သွားတယ်ပေါ့။ 1 GB လောက်ဆိုရင် convert လုပ်ဖို့ အချိန် တော်တော် စောင့်ရမှာ အမှန်ပဲဗျ။

နောက်တချက်က စာ ရှာတဲ့ အခါမှာ အဆင်ပြေအောင်ပါ။ MZ မှာ မေးပြီးသား မေးခွန်းတွေ ပြန်ပြန် မေးနေတာ တွေ့ရတယ်။ ဒီ မေးခွန်း တွေ့ဘူးတာပါတယ် ဆိုပြီး search လုပ် မတွေ့။ နောက်ပြီး google မှာ ပြန်ရှာ။ တွေ့တော့ တွေ့ပေမယ့် ရရစ် သုံးတာတွေ မတူတော့ search results က တိကျမှု မရှိဘူးပေါ့။ အဲဒီ ပြဿနာလေးတွေကို unicode နဲ့ လွယ်လွယ် ရှင်းလို့ရတယ်။ ဒီ အကြောင်းတွေတော့ ညမီးအိမ် သိပြီးပါပြီ။

keyboard မသွင်းချင်ဘူး။ font မသွင်းချင်ဘူးဆိုတဲ့ သူတွေ။ ခဏ စောင့်ပါ။ font ကတော့ embed လုပ်ထားပြီးပြီ။ keyboard မသွင်းပဲ ရိုက်လို့ရအောင် keymagic ကို text box မှာ ထည့်သွင်းပေးသွားမှာပါ။ အဲဒါဆိုရင်တော့ keyboard မရှိလို့ font မရှိလို့ မရိုက်တတ်လို့ ဆိုပြီး မဖြစ်တော့ဘူးပေါ့။ keymagic embed က ဘယ်လို လဲဆိုရင် အခု ကျွန်တော့် blog မှာ သုံးထားတဲ့ dr.carbon ရဲ့ plugin ပါပဲ။ comment နေရာမှာ မြင်ရပါလိမ့်မယ်။ အဲဒါလေးကို mz မှာ ထည့်ပေးဖို့ လုပ်နေပါတယ်။ ဒီ အပတ်အတွင်း ကျွန်တော် ထည့်နိုင်အောင် ကြိုးစားကြည့်ပါမယ်ဗျာ။

အခု လက်တလော အတွက် keymagic နဲ့ စမ်းကြည့်ပါ။ မရရင် ကျွန်တော့်ကို ဆက်သွယ်ပါ။ ညမီးအိမ် အပါအဝင် အခြားလူတွေကို MZ ကို ပြန်လာစေချင်ပါတယ်။ unicode ကြောင့် မလာဘူးဆိုတာမျိုးတော့ မဖြစ်စေချင်ဘူး။ တချိန်က win ကနေ ဇော်ဂျီ ပြောင်းလဲခဲ့သလို အခု ဇော်ဂျီ ကနေ unicode ကို ပြောင်းလဲနေပါပြီ။ တဖြည်းဖြည်း ပြောင်းလဲနေတဲ့ အဆင့်လေးကို တချက်လောက် လက်ခံပြီး unicode ကို သုံးကြည့်ပါ။ နောင်တချိန် windows 8 မှာ မြန်မာစာ အတွက် သီးသန့် မထည့်ပဲ မြန်မာ လို ဖတ်လို့ရတော့မယ်။ တခြားနိုင်ငံမှာ library တွေကနေ တဆင့် မြန်မာစာကို ဖတ်လို့ရလိမ့်မယ်။ ဇော်ဂျီ သုံး ခဲ့တုန်းကလို library မှာ font သွင်းခွင့်မရှိလို့ စာဖတ် မရတာတွေ မရှိတော့ဘူးပေါ့။ ဒီလို အကျိုးလေးတွေ ဖြစ်လာမယ်ဆိုတာကို ကျွန်တော်တို့ မြင်လို့ ကျွန်တော် MZ ကို ကိုလူပျိုကြီး နဲ့ တိုင်ပင်ခဲ့သလို မပြောင်းခင်မှာလည်း ကြေငြာခဲ့ပါတယ်။ ပြောင်းပြီးတော့လည်း စာတွေ စုစည်းပြီး guide book လုပ်ပေးခဲ့ပါတယ်။ ကျွန်တော်တို့ နောက်မျိုးဆက်တွေက ကျွန်တော်တို့ ထက် ပို ကံကောင်းပါတယ်။ သူတို့တွေ computer မှာ မြန်မာစာ မမြင်ရဘူးဆိုတဲ့ ပြဿနာတွေ မရှိတော့ဘူးပေါ့ဗျာ။ မြန်မာစာ အတွက် font သီးသန့် သွင်းရမယ်ဆိုတဲ့ အတွေးတွေ ထုတ်လိုက်လို့ရပြီပေါ့။ အင်း keyboard ကတော့ ပြဿနာ နည်းနည်း ရှိသေးတယ်။ လက်ရှိ windows 8 က keyboard က သဝေထိုးကို နောက်ကနေ ရေးရနေတုန်းပဲ။ ကျွန်တော်ကတော့ keymagic နဲ့ mac os မှာ သုံးနေပါတယ်။ ကျွန်တော် unicode အဆင်ပြေသလို ညမီးအိမ် အပါအဝင် အခြား သူတွေကိုလည်း အဆင်ပြေစေချင်ပါတယ်။ unicode guide လေးကို အားရင် တချက်လောက် download ချကြည့်ပါ။ သွင်းကြည့်ပါ။ စမ်းကြည့်ပါ။ အခက်အခဲတွေရှိရင် မေးပါ။ အဆင်ပြေသွားမှာပါ။ ဒီနေ့ စလိုက်ရင်ပဲ ခရီးတဝက်ရောက်နေပါပြီဗျာ။